Geyi Waxaan Kunoolahay Xayawaanka Yaryari Ka Qiimo Badanyahay Caruurta Dalkaas. W/Q: Mr. Hamse Bashe (Wiyeer-yare)

Hordhac: Nabad-qab akhristayaal, waa mid kamid ah qoraaladii aan ugu talo galay in ay miciin iyo garab istaag unoqodaan dulmanaha iyo miskiinka cadaalada geyigeenu garabkiisa kabaxday. Qormadan waxaan kaga hadlayaa Maxakamada Degmada Hargeysa gaar ahaan Gudoomiyaha Cabdirashiid Maxamed Xirsi Beer-geel oo mudo todobaad gudihii ah fuliyey laba xukun maxkamadeed oo

labaduba dalka Somaliland iyo guud ahaan geyiga Soomaalida ku cusub yihiin, labadaas xukun oo faa’ido iyo waxtarba u ah geyiga, laakiin sida diinteena suuban iyo caqliga caafimaadka qabaaba ay si fudud u kala saari karaan labadaas xukun ka dembiga iyo jariimada weyn ee ay ahayd in xukunka loo kala siiyo.

Maxakamada degmada Hargeysi waxay xukun 3 sano ah ku riday dhamaadkii bishii 2aad ee aynu soo dhaafnay 5 nin oo lugu eedeeyey in ay si sharciga deegaanka baal-marsan usoo qabsadeen diin isla markaana ay doonayeen in ay iibiyaan, waa run oo waa muhiim in xayawaanka iyo bilicida deegaankeena la ilaaliyo, waana ta sababtay in Wasaarad dhan iyo shaqaalaheedu ay kamid noqodaan Wasaaradaha kala duwan ee dalka ka jira, laakiin diinka 3 sano iyo lacaga ganaaxa ah loogu xukumay 5 wiil ee bilaa shaqada iyo nolosha adag ee dalku taabatay miyaanu ahayn ka ku darxumaysan wadooyinka waaweyn ee gobolada la iskaga socodo, oo maalin walba baabuurtu ku jiidho wadooyinka isagoo ka talaabaya.

Isla maxkamada degmada Hargeysi dhamaadkii bishii 2aad ee sanadkan waxay xukun ku riday danbiilayaal, tuug ah oo xaday qof nool oo mudo badan ay raadinayeen waalidkii dhalay, iyaga oo jidhkiisa doonaayey in ay u iibiyaan si qaybo-qaybo ah, taasina maanta waxay si aad ah ugu badantahay gudaha Hargeysa, dhibta iyo naxdinta waalidka soogaadhey oo keliya ayaa xukun xadhig ah maahee xitaa hadii dil toogasho lugu xukumo dambiilayaashaas aanay waalidku kasoo kabsanahayn, Xukunkaas maxkamadu waxay dambiilayaashaas ku xukuntay 2.5 sano waa labo sano iyo badh xadhig ah, halka kuwii diinka ay dantu u geysayna lugu xukumay 3 sano oo xadhig ah.

Bal hadaba akhriste ayaan-darida inagaga habsatay sharciga iyo maxkamadaha dalka waxaa ina tusaaya labada xukun ee aadka u kala dembiga weyn, haddan aadka u kala xukunka kala duwan.

Maxaa sababay? Ma maxkamada iyo gudoomiyaheeda Beer-geel ayaa arinta ilmaha yar aan si fiican u baadhin, halka ta diinka iyo 5ta wiilna ay si fiican u baadheen, mise xukunkii iyo sharcigii Maxkamaduhu isticmaali jireen ayaa isbedelay?

Hadii ay sidan kusii socoto beri ka maalin dembiilayaashii wiilka yar qafaashey xukunka way soo dhameysan doonaan waxaanay dib ugusoo noqon doonaan caruurteena iyo shaqadii hore ee ay hayeen, sidoo kale xukunkoodani halkii laga rabey in uu u quus gooyo cid kastoo fal dembiyeedyada noocan ah ku shaqada leh, waxa uu u noqonayaa dhiirigelin iyo in aanay ka cabsoonin xukun iyo Maxkamad midna.

Mudanayaal, Madaxweynaha Qaranka, Wasiirka Cadaalada iyo dhamaan garsoorayaasha Maxkamadaha waxaanu idinka codsanaynaa inta aydaan deegaan iyo diin xuquuqdiisa u dagaalamin in aad ubadka yaryar ee la xadaayo iyo hooyooyinka naxdinta la kici kari la’a aad xuquuqdooda usoo dhicisaan, waayo iyaga ayaa waajibaadka kowaad ee diinta iyo bin-aadaminadu uu idinka saaranyahay, Hadii aad dembiilayaasha caruurta qafaasha ee dalka ka dhoofiya jidhkooda oo gobol-gobol loo jarjaray aad wax ka qaban weydaan ogaada tan diinka iyo mid kaloo aad ku hamiyeysaan midna weligiin in aanu idiin suurto galahayn.

Wabilahi tawfiiq.

Mr. Hamse Bashe (Wiyeer-yare)

Qoraa / Saxafi madax banaan

E-mail: Xamse18@gmail.com

www.wiyeeryare.blogspot.com

www.twitter.com/wiyeeryare

www.facebook.com/wiyeeer

Hargeysa -Somaliland